Ginpaguwa ni Pangueong Ferdinand “Bongbong” Marcos Jr. ro isyu it territorial disputes at-sea sa anang pakigpagpueong kay Chinese President Xi Jinping sa anang kakatapos eang nga state visit sa China.
Raya ro ginkumpirma ni House Speaker Martin Romualdez kasunod it anang pagbalik sa nasyon kaibahan si Pangueong Marcos.
Si Romualdez hay kaparte it opisyal nga delegasyon ni Marcos sa China sa pagbisita it Pangueo ko Enero 3 hasta 5.
Suno kay Leyte 1st district congressman, gintalakay nanday Marcos ag Xi ro mga sensitibong isyu ngara nga may pagrespeto sa kada isaea.
Dugang pa ni Romualdez nga ro daywang lider hay may sinseredad sa mga pamisaea it kada isaea ag pagsabat sa tanan nga mga isyu.
Ginpahayag pa kara nga ro mga maritime disputes hay bukon it katapusan sa Manila-Beijing relations.
