KALIBO, Aklan—Dismayado ro mga operators and drivers it public utility jeepney ukon PUJ nga byaheng Tangalan, Makato, Nabas, Caticlan vice versa matapos nga ro andang pasahero hay gina-cater it UV express ukon mga L300 van ag ceres bus nga diretso iya sa banwa it Kalibo vice versa.
Suno kay Mr. Edgar Igcasenza, president it Lezo-Malinao Multi Purpose Cooperative nga raya makaron ro hinanaing it kapareho nandang drivers bangud nga uwa it nagakaigong koordinasyon kanda matapos nga gulpi eamang sanda nga ginharang ko adlaw it Lunes nga inde eon sanda pwede nga magsueod iya sa banwa it Kalibo kundi hasta eang anay sanda sa temporaryong terminal sa Brgy. Bulwang.
Apang, ro mga UV express suno kana hay nakadiretso pa iya sa banwa it Kalibo ag maging ro mga ceres bus nga uwa nagdivert it ruta sa diversion road.
Ginpahayag nga kon sa ana nga mga miyembro hay uwa nanda ginabatyag ro kawad-an it sangkiri nga kita apang mas masakit ag nakakadismaya sa parte it ibang drivers sa mga may byahe sa nasambit nga lugar.
Dapat suno kana agud nga malikawan nga magginutok it husto ro trapiko hay pati ro UV express inde eon makadiretso sa Kalibo agud nga mataw-an man it aksyon ro hinaing it kapareho nandang drivers kamana man paeareho sanda nga idto tanan sa temporaryong terminal magahueat it andang mga pasahero.
