Nagpangayo eon it tabang sa National Bureau of Investigation (NBI) ro pamunuan it Department of Social Welfare and Development (DSWD) angot sa natabu nga pagpang-hack sa andang social media accounts.
Madumduman nga nauna eon nga bumuhos sa DSWD ro mga benepisyaryo it Sustainable Livelihood Program (SLP).
Raya hay maskin nga owa pa it aplikasyon sa nasambit nga programa ag owa pa it ginapanupod nga ayuda.
Pamatuod nga grabe gid man ro fake news.
Maabung senior citizens, nabdos ag pati unga ro nabudlayan.
Rason nga indi basta-basta nga magpati sa mga hambae-hambae, tsismis ukon post online.
Siguraduhon nga legit ro ginhalinan it impormasyon agud nga indi mabiktima.
Puwede man nga direktang makipag-angot sa natungdan agud nga sigurado.
Samtang, raya man nga mga hacker nga owa it mahimo sa kabuhi , makonsensya man kamo.
Punduhon eon ro pagpangloko sa isigkatawo.
Ro kaaeam ag ikasarang hay ginagamit sa tama ag kamaeayran bukon it sa pagpamentaha.
Indi matukso bangud nga royun hay may balik.
Apela man sa NBI ag sa iba pang ahensya it gobyerno, doble ukon triple-kayod pa sa pagtugis sa mga hacker.
Kon madakpan, ubahan eagi it maskara ag pasabton agud nga indi eon mauman ukon tuearon it iba.
