KALIBO, Aklan—Ginkalipay it mga opisyal ag residente it Barangay Jumarap, Banga ro nakataeanang rehabilitasyon sa andang nasamad nga revetment wall.
Suno kay kagawad Rolando Reyes it nasambit nga barangay nga mabahoe ro andang pagpasaeamat nga nataw-an eon it aksyon ro andang mabuhay nga problema.
Nasayuran nga sambilog ro opisyal sa mga eubus nga nagakabaeaka sa padayun nga pagkatimpa it eugta sa kilid it Aklan river bangud nga haeos pitong metros eon lang ro distansiya it anang baeay sa suba.
Mag-eowas kana, maabu nga iba pang residente ro posibleng madaeasa ag maduea-an it baeay sa oras nga mas pang mag-eapad ro pagkabkab it tubi.
Ginpromisa sigon kanda it Department of Public Works and Highways ukon DPWH nga posibleng sa katapusan it makaron nga buean it Enero ukon sa Pebrero paga-umpisahan ro proyekto.
Madumduman nga ginpahayag sa Bombo Radyo ni Engr. Joey Ureta, maintenance head it DPWH-Aklan nga posibleng sa Enero 26, 2023 pagahiwaton ro bidding process agud nga matumod ro construction company nga magabuyot sa proyekto.
Ro pondo nga naga abot sa kapin sa 20-milyon pesos hay halin sa taeatapan ni Aklan 1st district congressman Carlito Marquez sa idaeum it 2023 General Appropriations Act ukon GAA.
Sa makaron hay ginahueat eon lang nanda ro Special Allotment Release Order ukon SARO sa pagpaguwa it pondo agud nga maumpisahan eon ro proyekto.
