Ginbasura it Sandiganbayan ro hinyu ni dating First lady Imelda Marcos ag it anang onga nga si Irene Marcos-Araneta nga bawion ro mga propyidad nga gin-agaw kanda sa nandang na-dismiss nga P200-bilyong civil forfeiture case.
Sa 40-pages it resolusyon ko Enero 25, ginpahayag it Fourth Division it korte nga ro mosyon it daywang miyembro it pamilya Marcos nga nagahinyu nga maibalik ro mga propyidad kaibahan ro mga kumpanya ag propyidad nga eugta nga gindeklara bilang ill-gotten wealth ag sequestered it Presidential Commission on Good Government (PCGG) hay ginbasura bangud sa kawad-an it merito.
Sa andang mosyon ko Agosto 5 2022, ginhinyu it dating first lady ag ni Irene nga maibalik ro mga narekober nga propyidad, nga gindeklara bilang mga frozen account, nga ginsurender sa gahum it compromise agreement, nabuoe apang owa sa kustodiya it PCGG, ag ro mga naboue sa idaeom it kontrol ag pagdumaea it PCGG.
Naging emosyonal man sanda sa printe it korte nga ro desisyon sa andang na-dismiss nga kaso hay nagtuga kanda it grabe pag-antos, mental ag emosyonal nga halit kung siin umabot it masobra tatlong dekada antes naresolba ro kaso.
Apang ginpahayag it Sandiganbayan, sa andang resolusyon, nga natyempo para sa PCGG nga magdihon it apela sa na-dismiss nga kaso sa Korte Suprema ko Agosto it nagtaliwan dag-on,kung siin ginhimu ro desisyon nga ginbasura ro kaso bangud sa bukon pa it pinal.
Ginpahayag man it korte nga owa it mabug-at nga ebidensiya ukon rason nga maitao ro pamilya Marcos kung paano nga naduea ro nasambit nga mga propyidad nga subject it nasambit nga kaso.
