Gin-aprubahan eon it House of Representatives sa ikatlo ag ulihing pagbasa ro proposed bill nga nagapanaba sa retirement age it mga nagatrabaho sa gobyerno.
Halin sa dating 60-anyos, paga-obrahon raya nga 56-anyos.
Nakabaehag sa House Bill No. 206 nga ro mga trabahador sa gobyerno ag kuwalipikadong miyembro it GSIS nga may edad 56 ag nakaserbisyo eon it 15 anyos hay makabaton it benepisyo.
Madasig nga naaprubahan ro proposisyon ag sambilog eamang ro nagkontra sa 268 nga mamalidha.
Sambilog ro nag-abstain.
Ro pagpanaba it retirement age it mga nagatrabaho sa gobyerno hay naging pareho man sa mga soldado ag pulis nga ro mandatory retirement age hay 56.
Nagpabutyag man ro GSIS nga nagapangatubang sanda sa mabahoe nga problema sa pagpanaba it retirement age.
Malipayon man nga ginpahayag ni House Speaker Martin Romualdez nga sa pagpanaba it retirement age, pwede eon nga mag-enjoy ro government workers samtang kaibahan ro andang pamilya ag mga amigo.
Ma-enjoy eon it retirado ro benepisyo antes pa sanda nga mag abot sa senior years.
Maabu man ro naghambae nga bukon it manami nga panabaan ro retirement age bangud nga masyadong bata pa para magretiro ro 56-anyos.
Maabu man sa mga may edad nga makarondaya ro may ginasuportahan pang unga.
May una pa nga ginapa-eskwela.
Kaabuan hay may mga apo nga ginapakaon.
Kaabuan hay owa it tinipon bangud nga bastante eang sa kinahangeanon ro suweldo.
Kun mabo-oe eon ro benepisyo sa edad nga 56, madali eang raya nga maubos bangud nga owa it ibang paeangitan-an.
Basi maging paeas-anon pa ro mga raya sa ulihi nga mga paniempo.
Mas mayad sigon nga ayuson anay ro retirement system.
Antes nga gin obra ro pagpanaba sa retirement age, ginpataasan anay kunta ro benepisyo.
Hasta siin ro maagtunan it sangkiri nga pension halin sa GSIS ag maskin sa SSS.
Owa kunta ginmadali ro House Bill 206 ag nag agi anay sa mga konsultasyon kaibahan ro mga magretiro.
