Natukiban ni punong barangay Rafael Briones it Briones, Kalibo nga owa pa it katunga ro natapos nga housing unit it national housing authority ukon NHA sa nasambit nga lugar.
Suno kana nga raya hay anang nasayuran sa pagtambong sa hearing it sangguniang panlalawigan ko nagtaliwan nga adlaw kun sa siin gintalakay ro mga nagkaeain-eain nga isyu angot sa pabaeay sa lugar.
Sa record nga anang nabo-oe, 399 pa eamang nga baeay ro natapos halin sa target nga 851 units.
Raya hay may budget nga masobra sa 246 milyon pesos.
Ginpahayag dugang nga maskin nga tapos eon ro pilang mga pabaeay, pila sa mga unit hay owa pa gina-okupahan it mga benepisyaryo samtang ro iba hay ginapa-rentahan ro andang unit.
Pila pa sigon sa mga raya hay owa naila nga magpalista bilang residente it lugar base sa resulta it ginpatigayon nga pinaka-ulihing survey it community based monitoring system ukon CBMS.
Sa pihak nga parte, dismayado man ro pilang naga-okupa sa pabaeay bangud nga sanda pa ro naggastos sa pagpatakod it linya it kuryente ag tubi.
Suno kay kapitan Briones nga kabaliskaran raya sa ginpirmahan nga kontrata.
Apela man nana sa mga natungdan nga dapat itau sa nagakabagay nga beneficiary ro mga pabaeay eabi eon ro mga naga-istar sa danger zone
