Ginaduso makaron ni Kalibo sangguniang bayan member Ronald Marte nga magpatindog it school building para sa mga estudyante nga gustong mag-eskwela sa TESDA.
Suno kana, raya hay ana mismo nga inisyatibo kasunod sa mga nataeopangdan nga maabo ro gustong mag-eskwela sa TESDA apang limitado eamang ro ginabaton nanda ag nagadayo pa ro mga raya sa ibang lugar kon sa siin idto ro mga kagamitan nga pwedeng magamit.
Ginpahayag dugang nga ro ginaduso nga Kalibo skills training center para sa TESDA hay tuyo kara nga inde magtaeang-taeang ro mga estudyante.
Mag-eowas kara, in-demand sa ibang nasyon ro skilled workers partikular sa Korea, Taiwan ag iba pang nasyon.
Target it anang proposisyon ro mga out of school youth agud nga mabuligan ro mga raya nga makabalik sa eskwelahan pinaagi sa ginatanyag nga klase ag training it TESDA.
Ro nasambit nga school building engkaso nga makakita it pondo para dikara hay punterya nga igapatindog sa eogta it LGU sa Brgy. Nalook, Kalibo.
Ginpahayag ni Davao del Norte 1st District Rep. Pantaleon Alvarez, nga posibleng maging exporter it marijuana ro Pilipinas engkaso nga raya hay maging laye.
Raya hay kasunod it House Bill 6783 nga gindihon ni Surigao del Norte 2nd District Rep. Robert Ace barbers, Chairperson it House Committee on Dangerous Drugs, nga may tuyo nga boe-on ro marijuana sa listahan it mga dangerous drugs sa nasyon.
Suno kay Barbers, ro cannabis oil hay makabulig sa mga pasyenteng may grabeng sakit.
Insigida man raya nga ginpamalibaran it Department of Health (DOH) bangud nga posible raya nga magtuga it peligro sa publiko.
Madumduman nga sa ginpatigayon nga pagpamati it House Committee on Dangerous Drugs, kumpiyansa si Alvarez, raya ro magiging solusyon sa rice smuggling sa Pilipinas engkasong pasugtan ro mga mangunguma nga magtanum it marijuana.
