Nagbutang it oil spill boom ro Philippine Coast Guard kaibahan ro Malay Municipal Disaster Risk Reduction Management Council ag Malay PNP personnel sa puka beach sa isla it Boracay.
Suno kay Coast Guard Ensign Eulogio Quinto III, raya hay bilang preparasyon engkaso nga umabot sa nasambit nga isla ro oil spill maghalin sa Naujan, Oriental Mindoro.
Nauna eon nga ginduea it PCG ro kabaeaka it mga residente ag turista bangud sa maeapnagon nga oil spill sa kaeapit nga isla apang uwa gihapon nagapakampante ro marine environmental protection unit rason nga insigida sanda nga nagbutang it oil spill boom agud nga maagapan insigida engkaso gidman nga makaabot sa kaeawran it Boracay ro epekto it oil spill.
Ginpahayag dugang ni Quinto nga ginahimo nanda ro tanan kaibahan ro lokal nga gobyerno agud nga maprotektahan ro Boracay eabi eon makaron nga sigidas ro pagdagsa it mga turista ag bakasyunista.
Madumduman nga kapin sa 800,000 nga litro it industrial fuel ro karga it nag-eogdang nga MT Princess Empress kon sa siin nagtuga raya it grabeng halit sa marine ecosystem sa lugar ag mga residente eabi eon sa mga mangingisda.
Samtang sa pihak nga parte, gindeklara ni Quinto nga eowas paligsan ro baybayon it Boracay hasta nga inde makaabot ro oil spill sa nasambit nga kaeawran.
Panugyan kara sa publiko nga engkaso nga may mataeopangdan nga oil spill sa maskin siin nga parte it baybayon it Boracay hay insigida nga magreport sa mga natungdan agud nga makahimo sanda it tikang para sa kaeowasan it mga beach goers
