Nagpromisa si Commission on Elections (Comelec) chairperson George Garcia nga mas pangpagahugutan it poll body ro pagtinguha kara sa pagresolba sa mga election protest ag iba pang alitan nga angot sa eleksyon.
Raya hay ginpahayag ni Garcia bilang sabat sa pahayag ni Senator Risa Hontiveros nga ro pagpatay kay Negros Oriental Governor Roel Degamo hay bangud eon man sa mabuhay nga pagresolba it anang election protest, mag-eowas sa iba pang poll dispute nga ginadumaeahan it Commisson on Election.
Suno kana, samtang ro poll body hay nakapagresolba it masobra 9,000 nga mga kaso, may una sa gihapon nga kapin sa 2,000 na nabilin nga resolusyon.
Sa pihak kara, ginklaro it Commisson on Elections nga bukon it sakop it andang hurisdiksyon ro mga proclaimed winners sa House of Representatives, Senate, Vice President ag President nga una sa idaeom it House of Representatives Electoral Tribunal, Senate Electoral Tribunal ag Korte Suprema bilang Presidential Electoral Tribunal.
Apang gin-aku ni Garcia nga may punto si Hontiveros apisar nga umapela imaw para sa pagkonsiderar kanda bangud ro komisyon hay shorthanded sigon sa manpower para iproseso ro tanan nga mga electoral protest nga gindihon sa pagpatigayon it May 2022 elections.
Sa makaron , sunod sunod sigon ro mga pagpanambang ag pagpatay sa mga pulitiko maghalin sa nagkaeain-eain nga mga lugar sa nasyon nga eubos nga maka-alarma
