Nagapadayon ro operasyon it Aklan grain processing center bilang suporta sa mga mangunguma it bilog nga probinsya it Aklan.
Suno kay Soviet Russia Dela Cruz, officer in-charge it Agri-Aqua Demonstration Farm and Training Center nga nahamtang sa Brgy. Nalook, Kalibo, nagapamakae it paeay ro gobyerno probinsyal, naga-uga, naga-galing ag nagabaligya man it bugas.
Sa makaron suno kana hay sanda eon ro nagasupply it bugas sa Aklan provincial hospital bilang pagpaeapad it andang operasyon.
Ginpahayag dugang ni Dela Cruz nga nagapamakae sanda it eabtong nga paeay sa presyo nga P16.50 kon manami ro klase.
Samtang sa clean and dry nga paeay hay may taripa sanda sa presyo nga P19 pesos apang uwa sanda nagapamakae makaron nga cropping season bangud nga uwa man sanda naila nga magkompetensya sa National Food Authority.
Ro Aklan grain processing center hay maka-uga it kapin sa an-om ka toneladang paeay kada adlaw apang may service charge nga piso kada kilo kamana man maka-galing raya it ap-at ka tonelada kada adlaw.
Ginklaro man ni Dela Cruz nga nagasunod sanda sa presyuhan sa merkado publiko rason nga nagaapela raya sa mga mangunguma nga tangkilikon ro andang serbisyo kamana man sa mga ahensya it gobyerno nga i-avail ro andang produkto bilang suporta man ag bulig sa mga lokal nga mangunguma.
