Nag-apela it kaklaruhan ag paathag ro pilang ka mga mangunguma sa banwa it Kalibo sa Department of Agriculture ukon DA matapos nga nakaangkon it kalituhan sa ginapanupod nga abono bilang ayuda sa mga mangunguma kasunod eon man it pagmahae it presyo kara sa pangkalibutanong merkado.
Ginpaathag ni Punong Barangay ag Farmers Association President Nelson Repeidad it Linabuan Norte, Kalibo nga kon ro imu nga ueomhan hay rehistrado sa Registry System for Basic sectors in Agriculture ukon RSBA hay may posibilibad nga makabaton ka it ayuda nga abono ag binhi maghalin sa nasambit nga ahensya it gobyerno.
Apang, ro sitwasyon sigon nanda haeos tanan nga mangunguma it nasambit nga barangay hay nahamtang ro andang kaeanasan sa bisinidad nga sakop it banwa it New Washington.
Haeos 75 porsyento suno kana it mga mangunguma ro nagaapela it kaklaruhan bangud nga ginbalibaran sanda it lokal nga gobyerno nga iya mag-avail it abono sa Kalibo bangud nga kon sundon hay sa New Washington sanda pwede nga makabuoe.
Apang, pag-abot man sigon sa nasambit nga banwa hay ginbalibaran man ro andang listahan bangud nga sangkiri malang ro gin-alokar kanda ag inde sarang nga mataw-an ro tanan nga mangunguma.
Panawagan nanda makaron nga mataw-an it nagakaigong solusyon ro andang problema.
