KALIBO, Aklan— Bawae pa para anuman nga labor groups nga magdihon it panibag-ong petisyon para sa umento sa suweldo sa pihak nga maabu nga mga trabahador ro nagareklamo sa mataas nga presyo it baeak-eon ag serbisyo sa nasyon.
Suno kay Atty. Sixto Rodriquez, Regional Director it Department of Labor and Employment ukon DOLE – Region 6 nga sang beses eamang sa sang dag-on dapat nga magpatuman it wage increase sa mga trabahador sa pribadong sektor.
Sa ginapatuman nga laye, ginpaathag kara nga sang beses eamang sa sang dag-on dapat nga makaangkon it adjustment sa sueod it sang dag-on.
Raya hay kasunod it pagdihon it daywang labor groups sa andang taeatapan para sa panibag-ong pagpataas sa sweldo, kun sa siin ginaduso nanda ro 100 pesos nga across the board wage increase.
Sa makaron sigon hay ginatumod pa nanda kon lehitimo ro nasambit nga mga grupo.
Sa sitwasyon makaron, ginpaathag it opisyal nga ko Hulyo eamang it nagtaliwan nga dag-on nagpatuman it umento sa sweldo ag ro Western Visayas ro kauna-unahan nga rehiyon ro nagpaguwa it wage order nga may pinakamataas nga umento.
Sa pihak kara, ginpaathag ni Atty. Rodriquez nga owa nanda ginabalewala ro petisyon ag sa kamatuoran hay ginatun-an nanda raya kaibahan ro ibang natungdan nga ahensiya it gobyerno kaibahan ro DTI ag NEDA kon may justification ag legal grounds ro hinyu.
Padayun sigon nga gina monitor it Regional Wage Boards ro presyo it mga nagapangunang baeak-eon ag serbisyo nga unang ginatigan-an it budget it mga obrero.
Depende suno kana sa resulta it pag monitor kon makaankon it panibag-ong pagsuma angot sa masunod nga wage increase nga kun ro laye ro pagabasehan hay pwedeng magpatuman sa buean it Hulyo 2023.
