Ginklaro niEngr. Jun Agravante, Presidente it Federation of Livestock, Hogs and Poultry Raisers nga bastante ro suplay it baboy sa probinsiya it Aklan sa pihak it pagbawae nga makaguwa ro mga liveweight nga baboy maghalin sa banwa it Balete.
Raya hay matapos ro ginasugid nga may pilang ka mga nagapamintahang traders nga ginabakae ro mga liveweight nga baboy sa manaba nga presyohanan kada kilo sa pagkabaeaka nga makaangkon it kakuaeangan sa suplay it baboy bangud sa nasambit nga kumpirmadong kaso it ASF virus sa nasambit nga banwa.
Padumdum kara sa mga hog raisers nga indi pag i-dispose sa manaba nga presyo ro mga alagang sapat bangud owa man sigon it dapat nga kabaeak-an ag iga-panik.
Mag-eowas kara, panugyan man ni Engr. Jun nga ipabilin ro presyohanan nga P160 kada kilo ag indi eon ipanaba pa hasta sa P140 kada kilo para malikawan ro pagkalugi.
Apela man it grupo sa mga kapitan partikular sa mga adjacent barangay it Balete nga brgy. Arcanghel Norte, Brgy. Sebaliw ag Toralba sa banwa it Banga kamana man sa brgy. Ogsip sa Libacao nga daeayon eon nga magpatuman it hugot nga boarder control checkpoints.
Kamana man sa kada munisipalidad it bilog nga probinsya it Aklan nga magapaguwa ro mga alkalde it executive order angot sa pagpatuman it boarder control checkpoints para mapunggan ro pagkalhit it ASF virus.
