Ginplastar it National Economic and Development Authority ukon NEDA ro mga insigidang aksyon agud nga masolusyunan ro ginatawag nga food inflation sa nasyon.
Raya ro naging kaundan it report ni NEDA Undersecretary Rosemarie Edillon sa naging pagpueong it Inter-Agency Committee on Inflation and Market Outlook ukon IAC-IMO.
Suno kay Edillon nga kinahangean nga pataason pa ro rice buffer stock agud nga makadungan raya sa pagkinahangean it publiko eabi pa ag ginaeauman ro epekto it El Niño Phenomenon sa nasyon sa buean it Mayo ag Hunyo.
Mag-eowas kara, ginaduso man it NEDA ro pagpatuman it biosecurity, hog repopulation nga nakapaidaeum man sa Integrated National Swine Production Initiatives for Recovery and Expansion program ukon INSPIRE.
Ginaduso man it NEDA ro improvement ag expansion it Kadiwa program nga direktang naga-angot sa mga mangunguma ag bumaeakae nga nagaresulta sa barato nga mga baeak-eon.
Kinahangean man sigon it ahensiya nga mapadasig ro pagtau it subsidiya sa mga mangunguma ag mangingisda agud nga makapahaum eagi sanda sa posibleng epekto it El Niño sa andang pangabuhian.
