Mas pang paga-striktuhan ag pagahugtan ro implementasyon it curfew sa mga pamatan-on sa banwa it Kalibo.
Raya hay kasunod it mga nag-eontad nga gang war sa tunga it grupo it mga pamatan-on nga umabot sa punto nga may nabiktima it pagpamana ko nagtaliwan nga gabie nga kon sa siin ro suspek hay boluntaryong nagsurender kay Kalibo mayor Juris Sucro.
Mag-eowas kara, ginpahayag ni Kalibo sangguniang bayan member Ronald Marte nga anang padalion sa pagbutang it mga kagamitan sa Children in Conflict with the Law ukon CICL Center nga makit-an sa Brgy. Nalook sa nasambit nga lugar.
Ginpasiguro nana nga dikara ibutang ro mga pamatan-on nga madakpan nga nagahimo it kalokohan sa banwa kon sa siin nakakasakit ro mga raya it kapareho nanda pamatan-on.
Samtang, panugyan nana sa mga ginikanan nga sikyaron ag usisaon gid ro andang mga inonga eabi eon kon nagakasikaeom agud nga inde ro mga raya mailbor sa anumang kinagamo nga andang ikapahamak sa ulihing inadlaw.
Samtang sa pihak nga parte, nag-apela man si PLt.Col. Ricky Bontogon, hepe it Kalibo Municipal Police Station sa tanan nga mga ginikanan nga inde gid pagpabay-an ro andang mga inonga sa guwa it andang panimaeay eabi eon kon dis-oras it gabie.
Ro ginalikawan sigon kara hay base maimbolbar sanda sa mga kinagamo eabi eon ro mga may grupo.
Dapat sikyaron sa tanan nga oras ro andang mga inonga ag giyahan sa tama nga daean.
