KALIBO, Aklan—Posibleng igapatawag it sangguniang panlalawigan it Aklan ro mga natungdan nga ahensiya it gobyerno agud nga masayuran ro pagpahaum nga gina-obra sa maeain nga epektong tuga it El Niño.
Suno kay Aklan 1st district board member Nemesio Neron nga raya hay kasunod it anang hinyu sa ginpatigayon nga session ko nagtaliwan nga adlaw.
Bilang chairman suno kana it committee on agriculture hay nagakabaeaka imaw sa ginpaabot kana nga concern it mga mangunguma ag mangingisda sa Aklan.
Nagakinahangean sigon nga pabaskugon ro pagpahaum sa ginaeauman nga epekto it El Niño nga nabatyagan eon sa ibang probinsiya.
Kapareho suno it National Irrigation Administration ukon NIA nga dapat nga may nakapahaum eon nga solusyon para sa El Niño bangud sa kakueangan it uean.
Paga-usisaon man sigon nanda ro mga mangunguma partikular ro andang mga kinahangeanon ag ro Department of Agriculture sa posibleng ayuda nga igatau.
Sa pihak nga parte, gusto man ni Neron nga masayuran ro status it African Swine Fever sa probinsiya ag posibleng mahimo it mga lokal nga opisyal ag Office of the Provincial Veterinarian agud nga malikawan ro pagkalhit it virus sa mga alagang baboy.
Gindugang pa ni Neron nga kinahangean man nga mtumod kon bastante ro supply it baboy sa probinsiya.
Ro paeag it ASF hay nakakaapekto eon sigon sa mga alagang baboy ag hog industry sa probinsiya.
Ro nasambit nga mga concern ni Neron hay gin refer eon sa committee on agriculture ag committee on laws.
