Eubos gid ro nabatyagan nga kasadya it sangka 73-anyos nga lola matapos nga maswerte nga nagdaog it 50,000 pesos sa bag-o eang natapos nga Grand Draw it Buena Mano Salvo Year 17 Promo.
Sa ginpatigayon nga grand draw it Buena Mano Salvo Year 17 Promo it Bombo Radyo ag Star FM, P2.5 million ro ginpanagtag nga premyo.
Raya hay kaparte it 8.5 million pesos nga kabilugan nga premyo sa Buena Mano Salvo Year 17 Promo.
Kun siin maswerte nga nagdaog it 50,000 pesos sa regional prize sa Visayas ro 73 anyos nga si Julieta Villas it Oyotorong St. Kalibo gamit ro proof of purchase nga surf laundry powder.
Suno pa kay nanay Julieta nga matapos ro pilang dag-on nga pagpasakop sa kada papromo it Bombo Radyo, hay sa wakas nagdaog eon gidman imaw it mabahoe nga papremyo.
Mabahoe sigon rayang bulig para sa anang pamilya ag sa pang adlaw-adlaw nanda nga kinahangeanon kun siin masyado eon sigon imaw nga eubog sa utang.
Sa kamatuoran sigon hay nadamgohan pa nana nga magadaog imaw sa nasambit nga papromo rason nga gintutukan gid nana maghalin nga nag-umpisa ro paggabot it mga maswerteng winners.
Angot kara, nagapasaeamat man raya sa bilog nga pamunuan it Bombo Radyo eabi eon gid sa Bombo Radyo Kalibo bangud sa makabig nga mabahoe nga grasya nga nabaton.
