Uman eon man nga owa nadayun ko lunes ro pagpasaka it kasong murder it Department of Justice (DOJ) kontra kay suspended Negros Oriental Rep. Arnolfo Teves Jr.
Raya hay angot sa kasong pagpatay kay Gov. Roel Degamo ag siyam nga iba pang katawo ko Marso.
Raya hay bangud nga ro mga ginahambae nga matibay nga testigo ag ro mga nadakpan nga suspect sa kaso hay medyu naga-aeatras eon.
Dapat ko lunes hay ginpasaka eon it DOJ ro kaso kontra kay Teves, nga owa nadayun bangud sa pagpamalibad nga makipagbueuligan it mga ginahambae nga testigong suspect nga direktang nagaturo sigon kay Teves sa natabu nga krimen.
Suno sa DOJ nga ro pagbaliktad it mga hitabu hay bangud sa pag-angkon it mga pribadong abogado it mga witness-suspects nga naglaygay kanda nga maghipos.
Mag-eowas kara, pila sa mga raya hay nag-isyu eon it bag-ong mga statement nga ginapatihan nga paagto eon sa pagbawi sa nauna nanda nga panaysayon.
Bangud kara, kinahangean nga ma-review it mga imbestigador ro mga statements ag record para sa case building.
Ro pangutana makaron, bangud sa gina alegar nga pagbawi it mga naunang witness-suspect naghina eon man baea it eubusan ro kaso kontra sa ginasugid nga ‘pinaka-utok’ sa pagpatay kay Degamo?
Posible ayhan nga ibalik it uman sa umpisa ro imbestigasyon ag pagtipon it mga matibay nga ebidensya nga magadum-ok kay Teves.
Kon makarondaya ro matabu, posibleng magbuhay eon man ro pagpasaka it kaso kontra kay teves.
Maabu eon ro nahambae angot sa kaso.
Maabu eon ro natabu nga announcement maskin nga kueang pa ukon bukon pa it konkreto nga nakaapekto man sa pagpasaka it kaso.
Mas mayad sigon nga indi anay magdaldal hasta nga owa pa natapos ro imbestigasyon.
Dapat nga ibuhos ro tanan kon may magasuporta eon nga mabakod nga ebidensiya sa pagpasaka it kaso.// owa pirme nagakadayun bangud nga mas gina una pa ro pagdaldal .
