KALIBO, Aklan—Nagahueat pa sa makaron it letter request maghalin sa komitiba it public transportation sa sangguniang bayan ro Federation of Tricycle Operators and Drivers Association angot sa planong pagpanaba it pamasahe sa banwa it Kalibo.
Suno sa presidente it pederasyon nga si Romeo Tubalinal, ginkasugtanan sigon sa nagtaliwan nga consultative meeting nga magpatigayon it public hearing sa kada barangay ro mga TODA kon sa siin dikato kasugtanan kon pila ro ipanaba sa pamasahe ag kon pila ro idugang nga pasahero.
Kon anu ro mayorya nga desisyon hay dato ro andang pagasundon apang sa makaron hay ginahueat pa nanda ro nasambit nga letter agud nga makahueag eon ro mga TODA sa barangay.
Ginpahayag dugang ni Tubalinal nga bukon pa man it syento porsyento nga eowas kita sa covid rason nga may una gihapon nga bukon it full capacity ro mga pasahero sa tricycle.
Madumduman nga nag-ugat ro nasambit nga proposisyon bangud nga nataeopangdan nga haeos tanan nga tricycle hay punuan it pasahero apang ro pamasahe hay ro nakasugtanan pa sa tyempo it pandemya.
