KALIBO, Aklan—Blangko pa ro barangay council it Tigayon, Kalibo kung sin-o ro responsable nga nagpilak it sinako-sako nga gin-chop-chop nga karne it baboy ag mga kasudlan kara nga ginpa-anud sa irigasyon sa nasambit nga lugar.
Suno kay Punong Barangay Gil Morandante it Tigayon, Kalibo nga ap-at nga ka sako ro nakita nga naga-eutaw-eutaw sa irigasyon ko nagtaliwan nga adlaw.
Posibleng naghalin sigon raya sa ibabaw ag inanod eamang sa andang lugar nga nadiskubre it mga residente.
May una man nga bilog nga baboy nga nagatimbang it 30 to 40 kilos nga nakasueod sa sako.
Posibleng maeapit eamang sa lugar ro may kahimuan, apang indi man nanda matumod kon residente raya it andang barangay.
Naga-alingasaw eon sigon ro mabaho nga hugum kun sa siin nagakabaeaka ro mga residente nga posibleng magtuga it sakit ro mga patay nga baboy nga mabahoe ro andang pagduda nga dinapuan it African Swine Fever ukon ASF.
Agud nga mapadali suno kana ro andang pag-eubong hay gingamitan nanda raya it backhoe nga ginpahueam kanda.
Gindugang pa ni kapitan Morandante nga may record sanda it mga hog raisers sa andang barangay, apang indi pa nanda matumod kon sanda ro nagpilak it mga patay nga baboy.
Samtang, apela ni kapitan Morandante sa anang mga nasakupan ag kaiping nga barangay nga maging responsable ag likawan ro pagpilak it anuman nga mga bagay eabi eon ro mga patay nga sapat sa irigasyon.
