KALIBO, Aklan — Nagpahayag it pagkaeasugot ro mga obispo halin sa Capiz, ag Romblon sa pagkontra it Diocese of Kalibo sa pagbukas ag operasyon it casino sa Isla it Boracay, bangud sa posibleng epekto kara sa mga pamilya ag pigado nga mga pumueuyu.
Sa tingub nga pa pahayag nanday Capiz Archbishop Victor Bendico, Kalibo Bishop Cyril Villareal ag Romblon Bishop Narciso Abellana, adlaw it Miyerkules, gin-engganyo nanda ro mga opisyal it gobyerno ag mga negosyante nga seryosong tun-an ro mga posibleng epekto it pagsugae sa komunidad.
Kaibahan sa mga pagkabaeaka nga namitlang it mga Obispo hay ro pagka-eugmok sa utang, problemang pampamilya ag pinansyal, kamana man ro posibleng pag-grabe it prostitusyon, pagpamentaha sa tawo, panakawan, ag iba pang krimen ag pagkalhit it ilegal nga droga.
Ginpamilit it mga lider it Simbahan ro importansiya it pag-umwad it ekonomiya ag turismo, apang bukon eamang ro kita ag kapitalista ro dapat nga maging basehan kundi pati ro kamaeayran it mga residente ag dignidad it kada pamilya.
Ro pahayag hay kasunod it pagbukas it Kaban Hotel and Casino Boracay ko Setyembre 16 sa Station 0, Barangay Yapak sa banwa it Malay.
Raya ro kauna-unahang hotel-casino sa isla nga may 88 kuwarto ag casino nga may eapad nga 2,000 metro kuwadrado ag lisensiya halin sa Philippine Amusement and Gaming Corporation o PAGCOR.
