KALIBO, Aklan—Ginklaru it Department of Public Works and Highways ukon DPWH Aklan nga ro mga contractor it gina-rehabilitate nga mga karsadahon ro may responsbilidad sa pagbutang it mga early warning device ag iba pang signages agud nga malikawan ro mga aksidente sa daeanon.
Raya ro ginpahayag ni Engr. Joey Ureta, head it maintenance section it DPWH-Aklan.
Suno kana nga kaparte it ginpirmahan nga kontrata it mga contractor ro pag angkon it traffic crime management plan.
Raya hay kasunod it ginpaabot nga reklamo sa taeatapan matapos nga sangka motorista ro naaksidente sa portion it national highway nga gina-repair sa banwa it Ibajay.
Ginpahayag dugang nga naga-supervise eamang ro andang taeatapan sa mga ginapatigayon nga road projects.
Apela man nana sa mga motorista nga likawan ro overspeeding ag pagmaneho it hilong kamana man nga magsunod sa traffic rules ag traffic aides.
Dugang pa nana nga indi pagmalitan ro mga gamit sa construction sites kapareho it mga caution tape ag bollards.
Sa pihak nga parte, gindugang pa ni Engr. Ureta nga madali eon lang nga matapos ro ginapatigayon nga road construction and rehabilitation sa Brgy. Naisud hasta sa Brgy. Colong-Colong sa banwa it Ibajay.
Natigayon eon man sigon nanda nga naayos ro dating ginareklamo nga poitholes sa eastern ag western side it probinsiya.
