KALIBO, Aklan—Ginapahauman eon it National Irrigation Administration (NIA) Aklan-Capiz division ag iba pang natungdang nga ahensiya it gobyerno ro posibleng maging grabeng epekto it El Niño phenomenon sa nasyon.
Suno kay Engr. Raymond Mojares, acting division manager it NIA Aklan-Capiz division nga pila sa andang plano hay ro pagbawas sa pagpatubod it tubi sa mga lugar nga andang ginaserbisyuhan.
Imbes nga kabilugan nga 1,848 ro service area nga andang mapatubi-an hay pagabawasan raya it 1,060 bangud nga sigurado sigon nga ro tail-end hay indi eon maabutan it tubi.
Samtang, aminado man si Engr. Mojares nga maskin wet season eon makaron nga Hulyo hay nakaexperiensiya sanda it kakueangan it tubi sa irigasyon.
Owa sigon it problema ro supply it tubi sa eastern side apang sa western side hay naka encounter sanda it problema.
Padayun man sigon ro andang information dissemination kaibahan ro natungdan nga ahensiya it gobyerno ag mga irrigators association agud nga maipaabot sa mga local farmers ro may kaangtanan sa El Niño phenomenon.
Eakip sa andang ginasuhestiyon hay ro pagtanum it baeatong , mais ag iba pang tanum nga owa nagakinahangean it maabu nga tubi sa mga lugar nga indi eon maabutan it andang serbisyo.
Base sa datos it Department of Science and Technology ukon DOST nga ro El Niño, sangka weather phenomenon nga nagaresulta it tigmaeaea hay posibleng maka apekto sa Ilocos Region ag iba pa nga parte it Luzon.
Posible man sigon sanda nga mag provide it mga water pumps bangud sa maeaka nga pag abot it mga uean.
