KALIBO, Aklan—Nagaeaum ro lokal nga gobyerno it Libacao nga mapadayun eon ro napundo nga construction it tulay nga maga-konekta sa Barangay Poblacion ag Barangay Magugba sa tunga it Aklan river.
Suno kay Libacao vice mayor Vincent Navarosa nga ro proyekto hay gin-umpisahan may daywang dag-on eon ro nagtaliwan sa idaeum it build, build, build program it administrasyong duterte nga ginadumaeahan it Department of Public Works and Highways ukon DPWH Regional Office 6.
Mabahoe ro andang pagpati nga posibleng na-pending ro proyekto bangud sa naexperiensiyahan nga economic crisis it nasyon nga epekto it nag-agi nga covid 19 pandemic.
Maskin suno kana si Department of Budget and Management ukon DBM Secretary Amenah Pangandaman hay nangawa sa anang pagbisita sa Libacao kan-o eamang kon ham-an nga owa pa napondohan ro proyekto sa pihak nga raya hay sa idaeum it multi year allocation it DPWH.
Bangud kara, pagapa-imbestigahan sigon it opisyal ro nadelay nga tulay nga nauna eon nga gingastusan it P50 milyon pesos sa first phase ag P90 milyon pesos sa second phase.
Ginaboeobanta nga P150 milyon pesos eon lang ro kinahangean nga pondo para sa 3rd ag final phase antes nga makompleto ro tulay.
Samtang, gindugang pa ni vice mayor Navarosa nga nagpromisa man sigon sanday 1st district congressman Carlito Marquez ag 2nd district congressman Teodorico Haresco kaibahan ro iba pang natungdan nga ahensiya it gobyerno nga magabulig nga mapursige ro proyekto sa 2024.
Sa oras nga matapos ro tulay, bukon eamang it 10 nga barangay it Libacao nga nagatabok sa Aklan river ro magapanipueos kundi maskin ro Barangay Panipiason sa banwa it Madalag sa pag angkon it road connection.
Makabulig man sigon raya it mabahoe nga mapadasig ro pag-transport sa mga agriculture products ag makaangkon it access ro mga pumueuyu sa government facilities ag services.
