KALIBO, Aklan—Eubus ro kalipay it 76 anyos nga lola matapos nga pormal eon nga mabaton ro anang P50,000 pesos nga premyo bilang regional winner sa ginpatigayon nga Grand Draw ng Buena Mano Salvo Year 17 Promo ng Bombo Radyo ag Star FM ko nagtaliwan nga Mayo it makaron nga dag-on.
Suno kay Julieta Villas, residente it Oyotorong Street, Kalibo nga plano nana nga ideposito anay sa banko ro anang kwarta agud nga sa oras it pagkinahangean hay may anang pagaboe-an.
Dugang pa kara nga pagabak-ean man nana it bisekleta ro anang unga nga mabuhay eon nga ginapangayo kana.
Ginsaysay pa kara nga antes ro grand draw hay nagdamgo imaw nga nagdaog sa promo rason nga ginsundan nana raya it pangamuyo.
Makabig suno kana nga literal nga damgo nga nataw-an it katumanan ro natabu bangud nga maswerteng nabunutan ro anang pangaean halin sa libo-libong mga entries.
Ginpasaeamatan man nana ro Diyos ag Bombo Radyo Philippines kamana man ro mga sponsors it promo, kun sa siin mabahoe nga sigon raya nga bulig eabi eon sa kapareho nanda nga nagakinahangean.
Sa pihak nga parte, ginbaton man it mga guaranteed prize winners ro andang natungdan nga premyo nga ginaeakipan nanday Rosario Perucho it Sitio Bukid, Brgy. Jawili, Tangalan nga nagbaton it P15,000 pesos; Angelika Dela Cruz it Purok 2, C. Laserna St., Kalibo nga nagbaton it P10,000 pesos; ag Mirasol Braulio it Brgy. Mambog, Banga ro anang P5,000 pesos.
Madumduman nga sa ginpatigayon nga grand draw hay kapin sa P2.5 million pesos ro ginpanupod nga premyo nga kaparte it P8.5 million pesos nga kabilugang premyo sa Buena Mano Salvo Year 17 Promo.
Nasayuran nga pormal man nga ginbaton it P1 million peso winner ro anang premyo nga nakilaea kay Ebenizer Melindo it Sta. Cruz Cannery, Polomolok, South Cotabato.
