BALITA Espesyal– Sangka babaye sa Chiba, Japan ro gin-aresto matapos disturbuhon ro emergency hotline it 2,761 beses sa rason nga imaw hay bored ag owa it maka-istorya.
Gin-aresto it Chiba prefectural police ro 51-anyos nga si Hiroko Hatagami it Matsudo city sa kasong obstructing the operations of a local fire department.
Gin akusahan si Hatagami it pauman-uman nga pag-obra it emergency call halin sa telepono sa anang baeay ag payphone sa anang neighborhood.
Matapos arestuhon, insigidang nag aku sa anang saea si Hatagami ag gindahilan nga imaw hay masubo ag gusto eang nana nga may magapamati kana ag magatau it atensyon.
Ro Matsudo Fire Department ro naga-asikaso sa mga emergency call sa andang lugar ag sanda man ro nagapadaea it ambulansya sa mga health related emergencies.
Suno kanda nga umpisa ko Agosto 15, 2020 hasta Mayo 25, 2023, nagtawag sa andang hotline it 2,761 beses si Matsudo ag nagapakuno-kuno nga nagakinahangean imaw it bulig.
Pila sa anang mga ginarason hay masakit ro anang tiyan, drug overdose, masakit nga siki ag iba pang fake health emergency.
Kon naga responde ro ambulansiya, magadahilan imaw nga nagmayad eon sa anang sakit ukon magapinuril raya nga owa imaw nagtawag sa hotline.
Maskin nga pilang beses nga gintaw-an it paandam si Hatagami nga indi pag disturbuhon ro hotline, ginpadayun nana raya sa sueod it daywang dag-on ag siyam nga buean.
Sa makaron, nakakulong si Hatagami sa police station ag posibleng ipaidaeum sa psychological assesment.
