KALIBO, Aklan—Agud nga mapun-an ro kakueangan it dugo, nagpatigayon ro lokal nga gobyerno it Kalibo it aktibidad nga bloodletting drive nga ginpatigayon sa sangka mall makaron nga adlaw, Hulyo 26.
Kadungan it aktibidad ro paglunsar it Bagong Kalibo model barangay 2023.
Suno kay Kalibo vice mayor Cynthia Dela Cruz nga matapos nga ma-conceptualize ro model barangay hay gin-eakot nanda ro blood letting activity bilang sambilog sa mga criteria.
Gintukod sigon nanda ro proyekto agud nga mapatuman ro mga programa it gobyerno sa kada barangay nga eubus nga makabulig sa mga pumueuyu.
Ro awarding ceremony hay pagahiwaton sa Disyembre kun sa siin ro premyo hay naga abot sa P400,000 pesos nga balor it proyekto.
Mag-eowas sa blood donation, pila pa sa criteria hay ro pag angkon it Material Recovery Facility; zero open defecation ukon ro tanan nga mga panimaeay hay may comfort room; drug free ag legislative compliance.
Sa makaron hay nagakinahangean ro banwa it 900 bags it dugo kada dag-on nga nagakahueugan nga ro kada barangay hay dapat nga makaangkon it 1% nga blood donor it andang populasyon.
Samtang, ro mga successful blood donor hay makabaton it food packs.
Ro aktibidad hay pagahiwaton kada buean hasta sa Disyembre.
Sa pihak nga parte, may ginaduso man sanda nga blood samaritan project nga magatau it bulig pinansiyal nga P1,800 pesos para sa blood processing.
