KALIBO, Aklan—Magiging representante it nasyon nga Spain ro Ilongga nurse sa igapatigayon nga Mrs Universe 2023 nga pagahiwaton ro coronation night iya sa Pilipinas sa maabot nga Oktobre 4 hasta 14, 2023.
Si Bombo International Correspondent Maria Edzel Lamparero Lopez ro pambato it Espanya sa nasambit nga pageant.
Raya ro kauna-unahan nga purong pinoy ro igasabak it Spain matapos nga imaw ro ginkoronahan bilang Señora Belleza Internacional en España 2023 nga ginsundan it Mrs. Spain 2023.
Ginpyerde nana ro mga kandidata it Colombia, Ecuador, Honduras, Mexico ag iba pang Latin countries.
Suno kana, dapat ro mga kandidata nga magahalin sa nagkaeain-eain nga nasyon hay makaabot eon sa Pilipinas sa Oktobre 4 para sa preparasyon kaparehas it pictorial.
Angot kara, maskin ginakoebaan hay positibo imaw nga makipagsukoe sa iba pang kandidata.
Si Lopez hay naga-edad eon 40-anyos ag presenteng nagatrabaho bilang nurse kamana man idto eon naga-istar sa Madrid, Spain sa sueod it 20 anyos.
Ro grand coronation it Miss Universe 2023 hay igapatigayon sa Oktobre 13 sa Newport Resorts World, Manila.
