KALIBO, Aklan—Makabig nga pinakamanami nga eksperiensiya ro pagtambong sa World Youth Day nga ginpatigayon makaron nga dag-on sa Lisbon, sa capital it Portugal.
Suno kay Bombo International Correspondent Paul Fredmark Tang Nolada nga raya eon ro ikaywang kahigayunan nga nakatambong imaw sa nasambit nga event.
Ro pagtambong sigon nana sa World Youth Day ko 2016 sa Poland hay bilang pilgrim ag makaron nga 2023 hay bilang individual volunteer.
Sa pagiging volunteer, nataw-an imaw it kahigayunan nga makapaeapit ag maka-istorya it personal si Pope Francis.
Gindugang pa ni Nolada nga ro pagpasakop sa World Youth Day hay matsa pagbuhi sa pagtu-o pinaagi sa pagbuylog it mga pamatan-on paagto sa sangka maumwad nga komunidad.
Pilang pilgrim, ro unang domingo sigon it mga raya sa event hay ro ginatawag nga Days in the Diocese ukon ro pagtambong sa nagkaeain-eain nga aktibidad it diocese sa nasambit nga lugar ag ro ikaywang domingo hay ro gathering of all young people in the whole world.
Sa pihak nga parte, makataliwan ro 32 anyos, uman nga pagahiwaton sa Asya partikular sa siyudad it Seoul sa South Korea ro masunod nga World Youth Day sa 2027.
Ro anunsyo hay ginhimo it Santo Papa ko domingo sa misa sa pormal nga pagtapos it event sa Portugal.
Naging host ro Pilipinas sa event ko 1995 nga naging kauna-unahan ag naga-isaeahanon pa eamang nga Asian country nga naging host it World Youth Day.
