KALIBO, Aklan—Kapin sa ap-at nga istraktura ro nadaeahig sa nag-eontad nga sunog sa Brgy. Tambak, New Washington.
Suno kay FO2 Enrico Nam-ay, arson investigator it Bureau of Fire Protection ukon BFP New Washington, nga tatlo sa mga istraktura ro totally burn ag sambilog ro partially damage.
Tinupok gid it kaeayo ro Kittleman’s Restobar nga ginapanag-iyahan ni Ma. Russel Kittleman; Alcedo Café and Restaurant nga ginapanag-iyahan ni Benny Alcedo, sangka garahe it kaiping nga baeay ag partially burn ro naangkon it Manobo Grill.
Sa inisyal nga imbestigasyon it BFP, naghalin sigon ro kaeayo sa chimney it Kittleman’s Restobar.
Suno sa mga staff, napan-uhan eon lang sigon nanda nga nagakasunog ro andang kusina kon sa siin madasig nga nagkalhit ro kaeayo.
Uwa sigon it nasalbar nga mga kagamitan ro mga staff it establisyimento.
Mag-eowas kara, may mga motor man nga gin-eamon it kaeayo bangud nga uwa eon nabuoe it tag-iya bangud sa madasig nga pag-eapta it kaeayo.
Suno pa kay FO2 Nam-ay ginaboeobanta nga nagaabot sa masobra P1,029,000 pesos ro naging danyos it insidente apang posible pang madugangan ro nasambit nga haega base sa igareport nga damage it mga tag-iya it nasambit nga mga istraktura.
