KALIBO, Aklan—Kapin sa 10 nga mga solar street lights ro natigayon nga ma-install it barangay council it Poblacion, Kalibo.
Suno kay punong barangay Neil Candelario it Poblacion, Kalibo nga ro pagpatindog it nasambit nga mga solar street lights ro andang nakikitang solusyon agud nga mapanaba ro kada buean nga gastos sa kuryente kamana man nga mapabilin nga eowas ro mga kalye kada naga abot ro gabi-i.
Partikular nga ginbutang ro mga street lights sa C. Quimpo hasta sa Barangay Bakhaw Sur.
Ro pondo it nasambit nga proyekto hay halin sa munisipyo it Kalibo.
Plano sigon it sangguniang bayan it Kalibo nga magtaeana pa gid it pondo agud nga mabutangan man it mga solar street lights ro Brgy. Bakhaw Norte sa masunod nga dag-on.
Sa pihak nga parte, gindugang ni punong barangay Candelario nga pinaagi man sa andang pondo halin sa 20% nga development fund, padayunon ro kaparehong proyekto nga paga-umpisahan makaron nga buean sa parte it Rizal St. hasta sa C. Laserna St. Kalibo.
Mag-eowas sigon sa pag rehabilitate sa mga street lights hay iga-upgrade man ro mga CCTV cameras sa nasambit nga mga lugar partikular sa riverside.
May koneksyon sigon ro mga gina-install nga CCTV cameras barangay hall ag MDRRMO Kalibo para sa monitoring.
