KALIBO, Aklan—Nakit-an eon ro daywang mangingisda nga naduea sa kaeawran nga sakop it Barangay Dumaguit sa banwa it New Washington kahapon it agahon.
Suno kay Jay Ann Rostro Zonio, naeowas it mga katapo it Philippine Coast Guard ukon PCG-Capiz nga nagbulig sa pagpatigayon it search and rescue operation ro mga mangingisda nga sanday Ryan Jay Rostro, 33-anyos ag tiyo kara nga si Michael Rostro, 45-anyos nga parehong residente it nasambit nga lugar.
Ginasugid nga kahapon it domingo bandang alas-7:00 it agahon hay nagpangisda ro daywa sakay it sangka baroto kat gulping makaexperiensiya it maeain nga paniempo bangud sa pagpanaeasa it bagyong goring nga ro sentro hay sa Luzon area.
Bangud sa mabaskog nga hangin ag uean nasamad ro makina it andang baroto ag inapok sanda sa baybayon it Sapian, Capiz.
Samtang, gindugang pa ni Jay Ann nga naalarma ag nagkabaeaka sanda matapos nga bandang alas-12:00 it udtro adlaw hasta ala-1:00 it hapon hay owa pa naka-uli ro magtiyo.
Pasado ala-1:30 sigon it hapon hay naka-chat pa ro anang magueang nga si Ryan Jay nga nagapangayo it bulig nga ma-rescue sanda bangud nga grabeng eamig ro andang nabatyagan.
Insigida sigon sanda nga nagpangayo it bulig ro andang pamilya sa PCG sub-station Dumaguit nga nag-communicate man sa PCG-Capiz.
Ginbuligan it PCG-substation sa Ivisan, Capiz ro daywa agud nga maka-uli sa andang pamilya nga una sa eowas nga kahimtangan.
