KALIBO, Aklan—Ginpaathag ni Atty. Jan Mar Barrios it Barrios Law Office nga kon ro sangka tituladong eugta hay ginpabay-an it mabuhay nga tiempo nga gingamit bilang aeagyan hay magiging ‘subject for easement of road right of way’ raya.
Suno kana nga kon ro tag-ana it eugta hay owa naila nga maging aeagyan ro anang propiyedad hay kinahangean nga gin-aksyunan raya ukon ginkuraean eagi it mas temprano.
Gindugang pa ni Atty. Barrios nga owa it mahimo ro tag-ana it eugta kundi nga i-waive ro anang kinamatarung eabi eon kon ro anang eugta hay naging bukas sa publiko ag mabuhay eon nga ginagamit nga aeagyan.
Apang dapat nga raya hay may eapad eamang nga 3 meters ro pinakaminimum.
Kon napalibutan sigon ro eugta nga ginapanag-iyahan ag owa it pwedeng maagyan ro saeakyan pasueod ag paagto sa pinakamaeapit nga pampublikong daeanon hay ginapasugtan it laye nga magbo-oe it portion it eugta halin sa mga nakapalibot nga property agud nga obrahon nga aeagyan ukon easement of right of way.
Base sigon sa Article 650 it Civil Code, kinahangean nga ro daean nga paga-obrahon hay pinakamatag-od paagto sa pampublikong daean ukon mga national highway agud nga kon pwede hay maisot eamang ro magiging perwisyo sa mga nakapalibot nga property owners nga mabawasan it eugta.
Nagpaandam man si Atty. Barrios nga kaeabanan nga bukon it madali ro proseso it pag ayos it right of way rason nga mayad nga makipagdayalogo sa mga natungdan.
Madumduman nga naging kontrobersiyal ro desisyon it pamilya Cristobal sa Brgy. Muguing, Banga matapos nga ipasarado ro portion it andang eugta nga nakasanayan eon nga agyan it mga tawo ag mga saeakyan pasueod ag paguwa sa muguing elementary school, barangay hall ag simbahan.
