KALIBO, Aklan—Maka-alarma ro sunud-sunod nga insidente it panakawan it baka sa pilang banwa sa probinsiya it Aklan.
Raya hay matapos nga sangka mangunguma eon man ro naging biktima.
Angot kara, naging emosyunal sa anang panawagan si Jessar Lachica it Barangay Pagsanjan, Banga sa mga suspek nga kon pwede hay ibalik ro anang alagang baka bangud nga raya eamang ro anang ginasaligan partikular sa pagpa-eskwela sa anang mga unga.
Suno kana nga nataeupangdan nana ro pagkaduea it anang alaga ko agahon it Pebrero 1.
Owa eon sigon ro anang baka sa puno it mahogany nga anang ginhigtan maeapit sa andang eanas.
Ginaboeobanta nga ro sapat hay nagabalor it P45,000 pesos ag nabdos kun sa siin haeos an-um nga dag-on eon nana nga gina-alagaan.
Samtang sa pag-review sa CCTV camera sa andang barangay, sangka puti nga van ro nakita nga ginapatihan nga ginkargahan it anang baka.
Antes suno kana naduea ro anang alaga hay nataeupangdan nana ro sangka motorsiklo nga haeos ap-at nga beses nga nagabalik-balik sa lugar kun sa siin nakahigot ro anang baka.
Mabahoe ro anang pagpati nga ro eaeaki nga naka-motorsiklo ro naga-survey sa lugar ag raya man ro nagserbi nga look-out kat ginpatigayon ro panakawan.
Dugang pa nga naduea ro anang alaga makataliwan ro limang adlaw matapos nana nga ginbaligya ro sambilog pa nana nga baka.
Sa pihak nga parte, nagpanawagan man si Lachica sa mga awtoridad nga mas pang hugtan ro andang monitoring agud nga ma-intercept ro mga suspek.
Ginasugid nga kaeabanan nga modus it mga suspek nga mag renta it van nga ginaboe-an it pungkuan agud nga may mabutangan it mga ginatakaw nga sapat.
