KALIBO, Aklan—Ginrekomenda ni Dr. Romeo Lorenzo, mental health professional nga dapat nga mataw-an it atensyon ro problema sa mental health.
Ginhimo it espesyalista ro panawagan kasunod it paghana nga pagpakamatay it sangka construction worker pinaagi sa pag-eumpat halin sa ika-5th floor it underconstruction nga building nga anang ginatrabahuhan ko agahon it martes kun sa siin nagbuhay it haeos pitong oras ro negosasyon antes nga nakumbinsi it anang amigo nga itau kana ro anang bitbit nga kutsilyo ag magpanaog sa nasambit nga building.
Suno kay Dr. Lorenzo sa anang pag-responde sa lugar, nakita nana ro biktima nga si certain eger nga nagakinahangean it atensyong medical bangud nga nakakaeksperyensiya eon raya it hallucination ag paranoia.
Raya suno kana ro pinakamataas eon nga lebel it depression nga kinahangean nga mabueong.
Masyado sigon nga delikado kon nakakaeksperyensiya it gutom ag owa it tueog ro sangka tawo nga depress bangud nga naga-angkon raya it feeling nga may mga tawong gustong magpatay kana.
Dugang pa it eksperto nga maabu nga tawo makaron ro nakakaangkon it mental health problems kapareho it anxiety, depression ag iba pang mental health problems nga indi masyadong mataeupangdan bangud nga indi makita sa andang physical appearance .
Masyadong delikado sigon ro mental health problems ag indi dapat nga balewalaon bangud nga kaeabanan raya nga nagaresulta sa suicide eabi eon kon masyadong mataas ro emosyon.
Samtang, pila sa mga intervention nga dapat obrahon hay magpakonsulta sa psychiatrist agud nga ma-assess ro anang sitwasyon ag regular nga imnon ro mga ginareseta nga bueong agud nga dere-deretso ro pagmayad.
Sa pihak nga parte, ro mismong tag-eawas suno kana ro makabulig sa mga tawo nga depress bangud nga kon makaangkon ro mga raya it pagbag-o sa mga gina-isip ag emosyon hay magabag-o man ro andang behavior.
