KALIBO, Aklan—Container nga gin-obrang improvised nga tangke it saeakyan ro ginatan-aw nga rason it pagkaeayo it sangka pampasaherong multicab samtang nagapila sa eastern side terminal sa San Lorenzo Drive sa banwa it Kalibo, agahon it Lunes, Abril 1, 2024.
Sa video, makita ro nasunog nga parte it saeakyan nga may rotang New Washington-Kalibo vice versa.
Base sa report, nagtuhaw ro kaeayo sa prente ag idaeum nga parte it multicab.
Sa mayad nga swerte ag insigidang nakapanaog sa driver’s seat ro driver, apang nag-angkon raya it paso sa anang waea nga alima ag tuo nga siki matapos nga magtapik ro kaeayo sa anang eambong.
Dugang pa nga owa man it pasahero ro saeakyan kat matabu ro insidente.
Ro driver nga nakilaea kay Romoe Villanueva, 63-anyos ag residente it Sitio Malogo Brgy. Poblacion, New Washington hay dayun man nga gindaea sa Aklan Provincial Hospital para sa nagakaigo nga medikasyon.
Ginpahayag dugang nga antes nga nag-agto sa terminal hay nagpatughong pa raya it gasoline nga ginsueod sa sangka container nga napilak paguwa it saeakyan antes pa nga nagdaba-daba ro kaeayo.
Natukiban nga ro container hay gin-obra nana nga improvised nga tangke.
Nag-spark sigon ro pilang wiring nga kumagat sa gasolina rason it pagtuhaw it kaeayo.
Nadaeahig man sa insidente ro sangka jeep nga biyaheng Kalibo-Dumaguit nga ginamaneho ni James Panado matapos nga nasunog ro anang headlight ag kurtina.
Samtang, laygay it Bureau of Fire Protection (BFP)-Kalibo nga nagresponde sa insidente nga ugali-on nga usisaon ro saeakyan antes nga magbiyahe agud nga malikawan ro aksidente.
Naga-abot sa kapin sa 20,000 pesos ro kahalitan sa natabu nga sunog.
Sa pihak nga parte, ginsaysay ni allan paglikawan, sangka driver nga nagbueuligan ro pilang mga drivers ag commuters agud nga matapna ro kaeayo pinaagi sa pagsabwag it baeas ag paggamit it fire extinguisher.
