KALIBO, Aklan—Uman nga ginpaidaeum makaron nga adlaw it Martes bandang alas-8 it agahon it National Grid Corporation of the Philippines (NGCP) ro Visayas Grid sa yellow alert bangud nga nagapabilin sa forced outage ro 16 nga planta it kuryente.
Sa ginpaguwa nga anunsyo it NGCP, ro peak demand para sa grid hay kapin sa 2,646 megawatts, apang ro available capacity hay kapin sa 2,877 megawatts eamang.
Ro yellow alert hay ginapaguwa kon ro operating margin hay bukon it bastante agud nga masabat ro kinahangeanon sa contingency it transmission grid.
Madumduman nga makapilang beses eon nga nagapaguwa it paandam ro NGCP angot sa manipis nga reserba it kuryente.
Nauna eon nga gin-aku it Department of Energy (DOE) nga ro sitwasyon it kuryente partikular sa Luzon ag Visayas grid hay naga-abot eon sa “crisis levels”.
