KALIBO, Aklan—Kasunod it ginaeauman nga pagpanaeasa it La Niña phenomenon sa mga masunod nga binuean, ginpakigbahin ni Kalibo Mayor Juris Sucro ro bag-ong Aluminum Riverine Response Craft ag Maritime Response Craft nga ginpurchase it lokal nga gobyerno para sa Municipal Disaster Risk Reduction Management.
Ginpahayag it alkalde nga pagagamiton raya it Kalibo MDRRMO Special Operations Unit sa mga emergency ag kalamidad eabi eon sa ginaeauman nga uwa it untat nga pag-inuean base man sa forecast it mga eksperto kasunod it pagpanaeasa it El Niño phenomenon.
Suno pa kay mayor Sucro nga kinahang-ean nga maging preparado sa tanan nga oras rason nga ginataw-an it prayoridad it anang taeatapan ro kaparehas kara nga proyekto agud nga may magamit sa oras it pagkinahang-ean.
Nasayuran nga ro banwa it Kalibo hay catch basin it tubi baha nga nagailig sa Aklan river maghalin sa ilaya nga portion partikular sa Libacao ag mga kaeapit nga banwa kon sa siin makapilang beses eon man nga naeomos sa tubi-baha ro banwa kapin eon kon mag-eapaw ro tubi sa estaka maghalin sa Aklan river.
