NATIONAL News — Gulpi eamang nga nahugos ro Cabagan-Santa Maria Bridge sa probinsiya it Isabela samtang may naga-agi nga trak.
Napilpilan ro sangka saeakyan sa insidente.
Nasayuran nga ginbuksan ro nasambit nga tulay pilang buean pa eamang ro nagtaliwan.
Ro Santa Maria Bridge hay gintawag nga “landmark bridge project” sa Isabela, base sa artikulo nga ginpaguwa it Department of Public Works and Highways (DPWH) ko Enero 17, 2018.
Ro 720-lineal meters landmark bridge nga proyekto it DPWH hay kabaylo it overflow bridge structure nga nagakonekta sa mga banwa it Sta. Maria ag Cabagan sa probinsiya it Isabela.
Base sa DPWH, nagabalor ro proyekto it haeos P640 milyon.
Suno pa sa DPWH, kaeabanan nga indi maagihan ro Cabagan-Sta. Maria Overflow Bridge kon mabaskog ro pag-uean ag nagaka-eumos raya sa baha ag kon naga-eapaw ro Cagayan River rason nga nagpatindog it panibag-ong tulay.
Magapanipueos kunta kara ro masobra sa 2,700 nga mga motorista kada adlaw ag mabawasan ro oras it biyahe sa Cordillera Administrative Region.
