NEW WASHINGTON, Aklan — Ginpaathag it sangka misis nga nagdangop sanda sa barangay council ag kapulisan agud nga mataw-an it nagakaigo nga aksyon ro natabu sa anang 18-anyos nga unga nga eaeaki matapos nga gina-alegar nga ginhana nga kidnapon it mga kaeaeakin-an nga sakay it sangka puea nga pick-up sa Brgy. Tambak, New Washington, gabi-i it Miyerkules, Pebrero 26.
Suno kay Mrs. Rhea Periane, residente it nasambit nga lugar nga nagtuga it trauma sa anang unga ro insidente.
Maskin sigon ro andang barangay council hay naalarma man rason nga gin-post ro natabu sa social media agud nga mataw-an it awareness ro publiko.
Apang ginakabig sigon it New Washington Municipal Police Station bilang fake news ro hana nga kidnapping incident.
Owa sigon it natabu nga struggle rason nga mabahoe ro posibilidad nga na-mininterpret eamang it anang unga ro pagpundo it puea nga pick-up nga may sakay sigon nga ap-at nga mga kaeaeakin-an puro mga mabahoe ro pang-eawason ag nagtueok kana it maeain.
Madumduman nga base sa panaysayon ni Periane nga nataeupangdan nanda it anang mister ro nagaharurot nga daywang saeakyan nga puea nga pick-up ag puea man nga kotse nga owa it plate number rason nga nagguwa sanda it andang baeay.
Kadungan kara, gina-nerbiyos nga nagpaeapit ag nagsugid ro andang unga sa natabu nga ko rato nga tiempo hay nagagamit it internet sa sangka piso wi-fi vendo machine sa prente it andang baeay.
