Lumobo pa ro kabilugan nga utang it gobyerno it Pilipinas sa P16.31 trillion sa pagtapos it Enero 2025, base sa datos it Bureau of Treasury (BTr).
Mas mataas raya it P261.47 billion ukon 1.63% kumpara katong Disyembre 2024, bangud mas abong nautang ro gobyerno ag tumaas ro haega it mga utang sa dolyar it atong nasyon tuga it pageuya it haega it piso.
Napansin it Treasury nga ro haega it piso hay naghina sa P58.375 sa pagtapos it Enero 2025 halin sa P57.847 sa pagtapos it 2024.Sa kabilugan, kapin 67.9% kara hay halin sa pangsueod nga utang samtang ro nabilin nga 32.1% hay halin sa pangguwa nga utang.
Sa pagtapos it Enero, tumaas sa P11.08 trilyon ro pangsueod nga utang samtnag lumobo man sa P5.23 trilyon ro utang sa ibang nasyon.
Sa pihak kara, hinambae it BTr nga nagapabiling manageable ro utang it gobyerno ag naaayon sa target kara nga suportahan ro pag-umwad it ekonomiya samtang ginasigurado ro pagpabilin it pananalapi.
Hinambae man it mga economic managers nga uwa it dapat ikabaeaka sa nagabahoe nga utang it nasyon samtang padayon ro pag pag-umwad it ekonomiya.
