Nagpaathag ro International Criminal Court (ICC) kun haman kinahangean arestuhon si dating Pang. Rodrigo Duterte kasunod it daeayong pagguwa it warrant of arrest kontra kana.
Sa ginpaguwa nga 15-page order it ICC nga ginpermahan nanday Pre-Trial Chamber Presiding Judge Julia Antoanella Motoc, Judge Sophie Alapini-Gansou, ag Maria del Socorro Flores Liera, mahaega ro pag-aresto ag daeayong pagdetene kay Duterte para masigurado ro anang patambong sa igapatigayon nga pagpamati.
Ginpamilit it ICC, uwa raya ginaeauman nga makipag-cooperate ro dating pangueo ag daeayong mag-adto kun padaehan eamang it summon.
Suno pa sa international court, ro naging desisyon hay resulta eon man it mga concern nga maeawig pa gihapon ro impluwensya it dating pangueo sa pihak it uwa eo imaw it buyot nga anumang posisyon.
Ginpamilit man it ICC nga may unang ‘hightened risk of interference’ ukon posibilidad it pagpangialam sa imbestigasyon ag posibleng paeag sa mga testigo ag mga biktima.
Bangud kara, mahaega sigon ro daeayong pag-aresto sa dating pangueo para mapabilin ro integridad it magiging pagpamati ag mapunggan ro anumang pagka-delay ukon pagsamad sa maga-iral nga legal process.
Unang ginoaguwa it ICC Pre-Trial Chamber ro warrant ku March 7 bangud sigon sa crimes against humanity it dating pangueo halin ku imaw hay alkalde pa it Davao City ag kat naging pangueo eon imaw it Pilipinas. Raya hay mga krimen nga naubra sigon ni Duterte halin ku November 1, 2011 hasta March 16, 2019.
