NATIONAL News — Ginapabugae it Department of Agriculture nga naging epektibo ro pagpatuman it maximum suggested retail price sa bugas para eubusan nga mapanaba ro presyo it imported nga bugas sa merkado.
Ginpahayag it DA, halin sa P64 kada kilo nga presyuhan it imported rice antes ro MSRP, makaron hay kapin sa P49 eon lang ro kada kilo kara sandig sa MSRP ko Marso 1.
Suno kay Agriculture Sec. Francisco P. Tiu Laurel Jr., posible pang magnaba ro MSRP antes nga matapos ro Marso kun padayun nga maganaba ro pangkalibutanon nga presyo it bugas ag magapabilin nga mabakod ro balor it piso kontra dolyar.
Nasayuran sa DA nga nagnaba man ro landed cost it imported rice halin sa Vietnam sa masobra sa USD490 kada metriko tonelada.
Angot kara, ginpasiguro man ni Sec. Tiu Laurel sa publiko nga ro pagnaba it presyo it bugas ag taripa hay indi makaapekto sa dag-unan nga P30 bilyong pondo para sa Rice Competitiveness Enhancement Fund (RCEF), nga nagasuporta sa lokal nga mga mangunguma it paeay sa idaeum it Rice Tariffication Law (RTL).
Nagaeaum ro gobyerno nga padayun pa nga maganaba ro presyo it bugas agud mas makabakae ro mga pobre it barato apang manami nga klase it bugas.
