KALIBO, Aklan — Pwedeng maghinyu it interim release halin sa pagkakulong si dating Pangueong Rodrigo Duterte samtang nagahueat it anang masunod nga hearing sa maabot nga Setyembre 23 .
Raya ro ginpahayag ni Atty. Plaridel Morania, sangka batikang abogado sa probinsiya it Aklan.
Apang suno kana nga raya hay nakadepende gihapon sa pagdesisyon it International Criminal Court ukon ICC .
Pwede sigon nga gamiton ni Duterte ro kondisyon it anang ikamayad nga eawas bilang basehan sa anang hinyu, apang kinahangean nga mapamatud-an it anang mga abogado nga sa Pilipinas eamang magamayad ro anang ginabatyag nga sakit, kun sa siin maabu man nga mga mayad nga ospital sa The Hague sa Netherlands.
Sa pihak nga parte, ginpaathag ni Atty. Morania nga sa masunod nga hearing, dikara pagakumpirmahon ro mga akusasyon kontra kana.
Obligado sigon nga mag-presentar kara it ebidensiya ro prosecutors agud nga ipakita nga may bastante nga basehan agud nga padayunon it korte ro pagbista sa kaso.
Pwede suno kana nga kontrahon it suspect ukon anang defense team ro ebidensiya it prosecutor sa pagahiwaton nga hearing it confirmation of charges.
Apang raya hay kon makadesisyon ro korte nga padayunon ro trial nga posibleng magbuhay it pilang buean ukon dinag-on.
Puro mga mayad man sigon nga abogado ro tagadepensa ni Duterte nga sanay sa International Criminal Court.
Madumduman nga si Duterte hay gin-akusahan it crime against humanity ukon pagpatay sa ginlunsar nga giyera kontra droga it anang administrasyon.
Samtang, ginpahayag dugang ni Atty. Morania nga masyadong confusing ro mga pahayag makaron it taga-gobyerno bangud sa owa nagakasinanto nanda nga pahayag ko una nga indi eon maga-kooperar sa ICC engkaso nga arestuhon si Duterte bangud nga bukon eon kita it miyembro kumpara sa nagakatabu makaron nga natigayon raya nga madaea paagto sa ICC bangud sa panibag-ong statement nga kinahangean nanda nga makipagbueuligan sa Interpol sa pagserbi it warrant of arrest .
Dapat suno kana nga sabton it gobyerno ro gindihon nga writ of habeas corpus it pamilya ni Duterte sa Korte Suprema.
