KALIBO, Aklan—Nagpaabot it paunang kinahang-eanon ro Municipal Social Welfare Development Office ukon MSWDO sa mga residente nga nasunugan ko Biyernes it gabie sa may bahin it N. Roldan Extension, Brgy. Poblacion Kalibo.
Suno kay MSWDO Kalibo officer Lolly Espino, may totally burned ag partially damaged nga mga panimaeay rason nga insigida sanda nga nag-adto sa lugar agud nga mataw-an ro mga raya it paunang bulig kaparehas it toiletress, banig, pagkaon ag maabong iba pa.
Ginpahayag dugang nga natupok gid ro andang mga nagapangunang kinahang-eanon rason nga madasig sanda nga nag-aksyon agud nga maayudahan eagi ro mga apektadong pamilya.
Samtang sa pihak nga parte, hugot man nga nagpadumdom si Punong Barangay Neil Candelario it Poblacion, Kalibo sa publiko nga maging responsable sa tanan nga oras agud nga malikawan ro sunog.
Hukson sa saksakan ro mga appliances ag iba pang gamit nga uwa ginagamita, bantayan ro mga ginaeaha sa dapog, i-switch off ro safety breaker kon ginaaywanan ro baeay ag siguradon nga nakasarado ro liquified petroleum gas tank kon uwa eon ginagamit agud nga malikawan ro kaparehas kara nga insidente.
Nasayuran nga sa gina-alegar nga napabay-an nga kandila nga nakasindi ro gintunaan it sunog.
