KALIBO, Aklan — Bangud nga amat-amat eon nga nababatyagan ro pagdagsa it mga pasahero ag turista nga nagabiyahe sa Caticlan jetty port makaron nga Semana Santa, nagpatuman eon it heightened alert ukon pinakamataas nga alerto ro Philippine Coast Guard (PCG)-Aklan.
Sa kamatuoran suno kay Lt. Jason Lavadia, provincial commander it PCG-Aklan nga antes pa man ro season it Semana Santa ag summer vacation hay nagpakalhit eon sanda it mga tawuhan sa Isla it Boracay ag iba pang tourist spot ag kasubaan sa probinsiya eabi eon ro mga lugar nga may dating nailistang insidente it pagkaeumos.
Kapin sa 70 nga mga tawuhan ro gin-deploy it PCG sa Boracay pa eamang umpisa Abril 13 hasta 20 agud nga masiguro ro kaeowasan it mga bakasyunista, kaibahan ro iba pang frontline personnel nga nagapatigayon it inspeksyon sa mga barko ag baroto sa nagkaeain-eain nga pantalan sa Aklan.
Nagapatigayon man sigon sanda it baggage inspection kabulig ro K-9 units ag may mga coastal ag seaborne patrol.
Hugut man nanda nga ginabantayan ro overloading it mga saeakyang pandagat agud nga malikawan ro anuman nga maritime incident .
Samtang, ko nagtaliwan nga adlaw it Domingo ukon Palm Sunday hay nakalista sanda it masobra sa 9,000 nga mga nagapasueod nga pasahero sa Boracay.
Apang kaeabanan nga nakakasunod man sa carrying capacity nga 5,000 hasta 6,000 tourist kada adlaw.
Ginaboeobanta sigon nanda nga hasta nga mag-abot ro Easter Sunday ukon domingo it pagkabanhaw hay mas pa nga magataas ro tourist arrivals.
