KALIBO, Aklan — Gindeklara it Aklan Police Provincial Office (APPO) nga “generally peaceful” ro pagdumdum it Holy Week sa pihak it pilang mga insidenteng nailista sa nagkaeain-eain nga parte it probinsiya.
Ginklaru ni P/Capt. Aubrey Ayon, spokesperson it Aklan PPO nga ro natabu nga insidente it pagpamuno sa banwa it Tangalan nga ginkamatay it biktima ag ginkanina it sambilog pa ko Biyernes Santo hay bukon it konektado sa pagdumdum it Semana Santa bangud nga owa raya naka apekto sa general order it selebrasyon ag owa raya natabu sa mga places of worship.
Nasayuran nga base sa sang domingo nanda nga monitoring, mag-eowas sa stabbing incident sa banwa it Tangalan hay may natabu man nga kaparehong insidente sa banwa it Malay.
Nakalista man it mga vehicular accidents sa Altavas ag Nabas.
Sangka sunog man ro nailista sa Brgy. Man-up, Altavas nga ginkamatay it sangka lola nga may sakit ag may sangka insidente it pagka-eumos sa banwa it Ibajay .
Sa pihak nga parte, maskin nga buhos ro mga bisita ag turista sa Isla it Boracay, ro nagapanguna nga tourist destination sa nasyon hay ginkalipay nanda nga owa it anuman nga naireport nga untoward incidents.
Antes ro tiempo it Kuwaresma, ginpahayag ni P/Capt Ayon nga nagpakalhit ro APPO it mga pulis sa bilog nga probinsiya agud nga masiguro ro kaeowasan it publiko.
Kaibahan kara ro mga nakadeploy sa mga simbahan, pilgrimage sites, nagapangunang karsadahon, terminals , commercial areas ag mga lugar nga ginapamasyaran.
