POLICE Report — Patay ro sangka 63-anyos nga babayi matapos barilon sa anang baba it sangka eaeaki sa Brgy. Nancapian, Malasiqui sa probinsiya it Pangasinan.
Suno sa Malasiqui MPS, ro biktima hay residente it nasambit nga lugar.
Base sa pahayag it menor de edad nga gumankon it biktima, samtang sa sueod sanda it andang sari-sari store hay nag-abot ro sangka eaeaki nga nakasuksok it puti nga helmet nga may bonnet.
Nagpanuktok sigon ro suspek ag naghambae nga magabakae it sitsirya.
Kat ginpaeapit it biktima ro anang ueo sa maisot nga bintana it anang baraka agud nga tan-awon ro nagabakae hay gulpi eon lang imaw nga ginbaril sa baba it suspek gamit ro cal. 45 pistol.
Matapos barilon ro biktima, insigida nga nagpaeagyo ro suspek.
Gindaea sa ospital ro biktima apang gindeklara nga dead on arrival it nagtatap nga doktor.
Padayun ro ginahimo nga imbestigasyon it mga otoridad para sayuron kon ano ro motibo sa krimen ag tumuron kon sin-o ro eaeaki nga nagbaril sa biktima.
