SHOWBIZ News — Napuno it mga gwapahon nga kababayen-an eakip ro daywang Aklanon beauties ro entablado it Miss Universe Philippines 2025 kadungan it pagpaindis-indis it 66 nga mga kandidata sa preliminaries sa Newport Performing Arts Theater sa Pasay City.
Nagpili ro pageant fans kun sin-o ro andang paborito pinaagi sa performances it aspiring queens, kun sa siin pila sa mga pamilyar nga mga pangaean ag itsura hay kanday Ahtisa Manalo, Winwyn Marquez, ag Katrina Llegado.
Gin-representar ni MJ Isberto Fernandez ro banwa it Kalibo samtang si Taylor Marie DeLuna sa banwa it Malay.
Nag-host sa event sanday Miss Universe Philippines 2024 ag reigning Miss Universe Asia Chelsea Manalo ag ro TV personality nga si Erika Kristensen-Lee.
Nag-umpisa ro preliminary competition bandang alas 10:45 pm, haeos tatlong oras nga atrasado sa original kara nga schedule nga 8:00 sa gabi-i.
Kaibahan sa ginpatigayon hay ro swimsuit round kun sa siin suksok it candidates ro lavender swimsuits ag purple cover-ups. Ginsundan raya it pagpakitang-gilas it contestants sa andang elegant walks sa evening gown category. Nangin selebrasyon man raya it Filipino ingenuity ag craftsmanship bangud kada gown hay obra it Filipino designers.
Abril 30 ro national costume competition samtang sa Mayo 2, alas-6:00 sa gabi-i, ro koronasyon sa Mall of Asia Arena sa Pasay City.
